Saturday, January 3, 2009

أحه يا عمر


آنتيكه: سياداتى وسادتى، الإنه فيها حنه، والتيتا فى الننه

بولوتيكه: حد فاهم حاجه

آنتيكه: اخرس انت، وخليكو معايا، طبعا كلكو فى التمام زى اخوكم.

بولوتيكه: مش عيب

انتيكه: سؤال رفيع يا أبو البلاتيك، ألا هو السيد وزير مخابراتنا زعيم القلب الصلب على رأى الاستاذ ضياء رشوان لا حس ولا خبر، ليه

بولوتيكه: بيقولو زعلان،

أنتيكه: أنا والمصحف بسأل واطمن بس، أصل الكل بيسأل وبيطمن هو الراجل بتاعنا فين

بولتيكه: ده سؤال عويص ما اجاوبش عليه

آنتيكه: طب ليه... ؟

بولتيكه: الراجل اختفى وساب ملف فلسطين لأبو الغيط.

أنتيكه: أساسا أساسا الملف ده بالذات مسحوب من الخارجية المصرية من عشر سنين على الأقل

بولتيكه: لا هو تاريخيا بيتم التعامل معاه من خلال دايره صغننه من بتوع الرئاسة على بتوع المخابرات

آنتيكه: الخارجيه عادى يعنى زى الاطرش فى الزفة بتاع فلسطين

بولتيكه: طبعا وآخر حد ممكن يساهم فى الملف ده هما الدبلوماسيين بتوع الخارجيه اللى اتقنطرو مع إنها صنعتهم.

أنتيكه: طول عمرى من ساعة ما اتولدت وانا عارف ان الملف ده فى إيد أسامة الباز طيب الله ثراه، وكان بيديره من منازلهم، وهاتك يا زيارات، وبوس،

بولتيكه: صحيح وطبعا زى مانت عارف بعد اتفاق القاهرة اللى رفض المرحوم عرفات يوقع عليه فى المشهد المشهور فى قاعة المؤتمرات بتاعة مدينة نصر واللى تلا واى ريفر وخيبتها، مصر بدأت فعليا تعاقب الفلسطينين،

آنتيكه: وجابت عباس نكايه فى الناس

بولتيكه: حصل حاجه مهمة بعد تدهورات المشهد الاربع سنين اللى فاتو، الملف بتاع السياسة المصرية فى الصراع العربى الاسرائيلى هبط بالكامل فى إيد المخابرات بعد تفاهمات تينت اللى هو رئيس السى اى ايه السابق لو فاكرينها قصدى فاكرينه ودخل رجالتنا بتوع المخابرات بقيادة اللوا البحيرى

آنتيكه: أه وكان معاه الظابط التخين ده اللى بقى محافظ سوهاج اسمه ايه سلامة

أيوه: المهم رجالتنا دخلو بسلامة الله يلعبو فى الشأن الفلسطينى

آنتيكه: قصدك يهدو النفوس بين الفصايل.

بولتيكه: طبعا، ومن ناحية تانيه كان فيه بناء على تفاهمات المعلم تينت تنسيق مصرى اسرائيلى بيخص المعابر وبينسق تعاملات اسرائيل مع بتوع غزة وأريحا، والحال مشى وزاد عدد قواتنا على الحدود باتفاق ملحق على اتفاقية كامب ديفيد اللى حددت القوات على الحدود بعدد معين وبتسليح معين، وفضل اللعب ع المكشوف شغال لحد ما وقعت الطوبه فى المعطوبه وحس بتوع حماس ان المصريين مش بيلعبوا بعداله وفيه شغل من تحت الترابيزة

آنتيكه: كانو ناجحين فى الانتخابات، وقلب عليهم عباس، واقال هنيه، مرضيوش بتوع حماس بالخيبة وقامو رقعو عباس وعياله علقة موت وطردوهم لحد جحر أريحا

بولتيكه: الخيبة بقى إن مبارك زعل واعتبر ده موجه ليه، وكان غايظه شغل الاخوان من تحت التاربيزه

آنتيكه: والراجل بيعز الاخوان من كل كلبه

بولتيكه: المصريين بدأو يخبطو فى حماس بطفولية ماتليقش بدولة اسمها مصر وبخبرات دبلوماسية عريقة

آنتيكه: ما انت قلت ان الدبلوماسيين اتحطو ع الرف ومسكها الظباط، وبقى العمده فى غزة هو عمر سليمان بذات نفسه.

بولتيكه: تعالى يا أيام وروحى يا أيام الاسرائيليين قلبوا المصريين، وزيارات سليمان اللى كل مره توصل للا شئ كشفت جانب كبير من اهتراء استراتيجية مصر فى الملف ده وانه مافيش استراتيجية ولا يحزنون

آنتيكه: بان ان اخر حد عاوز الفيلم بتاع فلسطين ينحل هما المصريين

بولتيكه: بان ده من ردود افعال القاهرة داخل الحوار الفلسطينى الفلسطينى

آنتيكه: اوعى تنسى طبعا كلام الحج مبارك العلنى واللى فى الأوض المقفولة وكلها كانت منحازة ضد حماس

بولتيكه: السعودية كانت بتلعب ع الحبلين باعتبار ده بقى عادة ملكية ربنا ما يقطعها يعنى، وحزب الله وسوريا كانو شايفين الموقف المصرى بيحاول يبعدهم عن المشهد الفلسطينى وبيستفرد بيه وبيوجهه ناحية ترجيح الكفة الاسرائيلية بوعى وبدون وعى.


آنتيكه: خدتنى لبعيد يا عم، هو فين بقى ابو الغيط فى الفيلم،

بولتيكه: مافيش ابو الغيط،

آنتيكه: ولا حته منه...

بولتيكه: تسيبى ليفنى جت تكمل فصل أخير من عملية خداع متخططه بذكاء لتأمين غطا عربى لعملية غزة الى محضرينلها من شهور، والمصريين افتكرو طرقعة التصريحات نوع من التكتيك الاعلامى عشان يخلو حماس تبطل

آنتيكه: يمكن عشان كده النطع كان واقف بيهش الدبان وهيه بتعلن الحرب على حماسمن ججنبه

بولتيكه: اصله كان بتوع اسرائيل بيستهبلوا مع المصريين ويقوللهم طيب احنا هانصبر عشان خاطركو، ومصر اللى كان فى ايديها اوراق لعب للسياسة الخارجية اتقلصت حركتها بشكل خايب، وبقت مش قادره لا توقف تدهور المشهد جوه غزه ولا قادره تسكت اسرائيل ولا قادره تفتح بقها اساسا حوالين اى موضوع مع امريكا وطبعا لا هى قادره تكلم ايران ولا سوريا ولا لبنان نصر الله ولا السعوديه، معندهاش اوراق ولا مبادرات حل، وموروطه ومش عارفه تلاقى حد عاقل يفكر ويطرحلها استراتيجية بجد تفك المشهد،

انتيكه: ماهى السياسة المصرية بقت بالقطعه

بولتيكه: تسيبى لقطت الخيط، ونيمت اللعيبة

آنتيكه: والمعلم عمر ؟

بولتيكه: نيمت الكل وورطت مصر فى مشهد خايب، وخليتها عامله زى المتآمرة.

آنتيكه: قصدك انها مش متآمرة!!

بولتيكه: سيسة مصر الخارجية بقت غبية وخايبه، التآمر عاوز عقل وذكاء شرير، مصر مابقاش عندها حتى من ده وربنا صارفلنا الغبا بزياده، بص حتى فى سحنه ابو الغيط وانت تعرف

انتيكه: تصدق فعلا

بولتيكه: تركيز مصر مع خلافاتها مع العرب جه على حساب ادراكها لحقيقة الصراع،

آنتيكه: وراحت مرميه فى حضن اسرائيل بخيابه وعمى كده. طب فين يا عم ابو الغيط من الفيلم ده.

بولتيكه: يا سيدى افهم، م الاخر ابو الغيط اساسا مش بيمثل فى الفيلم ده، طلع ضيف شرف غصب عنه.

انتيكه: يعنى عمر وحسنى شخطو فيه وقالوله اقف ورد وشوف شغلك، قام قالهم يا عالم انا مش فى الليلة وماعرفش اى حاجه عنها، انا كل دورى استقبل الناس الكباره فى المطار واتصور معاهم وادلى بتصريح مبهم زى اى متحدث صحفى، انا ما كنتش وزير خارجيه فى اللعبه دى.

بولتيكه: تقدر تقول كده تقريبا،

انتيكه: طبعا الشخطه جابت مفعولها. وطلع صاحبنا هيس وليس وقال كلام فاضى فضحنا بيه اكتر، طب عمر فين،

بولتيكه: عمر اللى ضحكت عليه تسيبى عميلة المخابرات السابقة واللى لسه ما نسيتش اللعب القديم طلعته م المولد بلا حمص وسهلت الطريق لغزه ودفعت نقوط فرح تنصيبها رئيسة وزرا

انتيكه: يعنى اثبتت على حسابنا انها مره كده، طب فين الريس عمر... طب فين الظابط



بولتيكه: الظابط استخبى بقى، وسابلنا الهلاهوطه أبو الغيط يقدم مشهد كوميدى من مشاهد ساعه لقلبك، ربنا يحظه

آنتيكه: ده راجل بتاع علاقات عامه، يقابل حد، يضرب نمرة تليفون ويحول الخط لعمر، يروح ينشر الغسيل، إنما يبقى واقف يرد على نصر الله وينعر كأنه بيدير سياسة خارجيه وماسك ملفات، فدى أحه كبيره والأكبر منها بقى.. أحه يا عمر.


بولتيكه: ما تقولش أحه قوى كده خرمت الأوزون